الولد وان طاب طيبه من خواله = وأن تردى فعلم أنهم خايبينـي

الولد وان طاب طيبه من خواله
وان تردى فعلم انهم خايبينـي


أشرب الفنجال واكـب البيالـة
طيبٍ واحـب سلـم الطيبينـي


السلام عليكم ورحمة الله وبركاته

من لا يعرف .. هذين البيتين .. بيتين أشهر من نار على علم
قد يجهل البعض قائلهما .. ولكن اكيد سمع بالبيتين من قبل
حتى اصبح مضرب مثل يتداوله كثير من الناس

قائل هذين البيتين ..

الشاعر / راشد بن حسن بن مانع بن رحيان الضاعني الملقب بــ ابن الذيب
وقيل انه توفي عام 1986م وهو في نجران وكان شايل معه شخص موصله الى قرية في نجران وحصل عليهم حادث وتوفي رحمه الله


راشد بن حسن .. كان يشتغل في شركة ارامكوا السعوديه وكان يقود سيارة الشركه ( جمس ارامكوا )

وكان كل ما شاف له رجلي والا طرقي على الخط يبي احد يوصله يقوم ابن الذيب ويوصله بدون مقابل على سيارة الشركه

حتى اشتهر عند البدوان لا جا احد يبي يروح مكان ولا عنده مطيه والا موتر يمشي في طريقه ويقول عسا يلقاني ( ابن الذيب ) على الطريق والا انا القاه


ويشيلني ويوديني للمكان اللي انا ابيه حتى قاموا الناس يطرونه ويحكون فيه وهم لا يعرفونه ولا قد شافوه


جاء يوم من الايام الا عجوز وعندها غنم تعد على الاصابع و ( راشد بن حسن ) .. كان مشغول ومتأخر على الدوام شوي

وشاف العجوز وشاف معها غنم تعداها وهملها .. عقب حزت في خاطره واستحى وراعي الطيب ما يجوز عن طيبه وقف الموتر ورجع للعجوز

يوم جاها قالها يامره انا ابشيلك وبوديك المحل اللي تبينه لكن بدون غنمك .. انا متأخر على الدوام واخاف غنمك تأخرني زياده

قالت له العجوز .. خلاص رح الله يستر عليك ياولدي

انا جالسه هنا انتظر ابن الذيب

هو اللي بيجيب العلم وبيوصلني المكان اللي انا ابيه انا وغنمي .. وهي ما تعرفه .. ولا تدري انه

( ابن الذيب ) .. هو نفسه اللي هي تكلمه ..

يوم انصدم ( راشد بن حسن ) بقولها .. وتعجب !!

قال اركبي يا خاله انا ( ابن الذيب ) وابشري بعزك ..

ابوصلك انتي وغنمك ..

وكانت انظمة ارامكو تمنع السائقين ان يشيلو الرجليه اللي يوقفون السواقين ويطلبونهم توصيلهم على طريقهم .. وشلون توصيل الغنم

حتى وصل علم .. للشركه بفعل ( راشد بن حسن ) .. وهدد بالفصل من الشركه اكثر من مره .. وبعض رؤسائه يأسوا من المحاوله معه .. واعجبتهم شهامته..

وصل العجوز إلى منصاها والمكان اللي تبيه ..

وقال هذهـ القصيده ..

قالها ابن الذيب من هاجوس بالـه

كلمةٍ يلعـب بهـا والبـال زينـي


قالهـا يومـه طرالـه ماطرالـه

من هواجيسٍ تشيـب المرضعينـي

حالفٍ ماخذ على الطرقـي ريالـه

وبالثـلاث محـرم أنـه مايجينـي


لالقيت اللي على ( السكه ) لحالـه

يلتفت ويقـول ويـن المستحينـي


أوقف الموتر حيا وأبـي الجمالـه

يوم ولد الـلاش وجهـه مايلينـي


الطمع في كـروة الرجلـي رذالـة

خص وان جابه مجـال الغانمينـي


والردي في حالـةٍ ماهيـب حالـه

واعوينـه مـن كـلام الطيبينـي


الردي لـو بـان مايذكـر عمالـه

مايعد الـلاش مقصـور اليمينـي


أركبه لعيـون مـن زيـنٍ دلالـه

ماتحاكـوا فـي قفـاه الرامسينـي


مابغى غيري وانـا مابغـى بدالـه

قاعدٍ لـي بالرجـا مـدة سنينـي


الصبي وان طاب طيبه من خوالـه

بالخـوال يسـال قبـل الوالدينـي


أشـرب الفنجـال واكـب البيالـة

تابـعٍ سلمـي سلـوم الأوليـنـي


ولاقعدنـا بالعمـل بنـا الرزالـه

ناخـذ العليـا طريـق الفايزينـي


غرني بعض الرجـال بكثـر مالـه

مادرى ان الموت في حبل الوتينـي


كيف ينفعني وابا(.........) خالـه

مايقوم البيـت دام السـاس طينـي


ماش وين اللي عوايـده الجمالـة

مثل ابن ظافر حمـد ليتـه يجينـي


الثنـا والجـود دايـم فـي خيالـه

علمـه ظافـر سلـوم الطيبينـي


جـوّد العليـا ولزمّهـا عيـالـه

وادركوا من علمتـه دنيـا ودينـي


واهني من باع حظه واشترى لـه

وسار في درب النبي وأخزى اللعيني


موقفـه ماكـل رجــال ينـالـه

من بغى ممشـاه يقعـد مرتينـي


كم ذبح من حايلٍ مـن حـر مالـه

وعادته لطمـة خشـوم العايلينـي








.




م\ن